Profesori i biologjisë, Et’hem Ruka flet me shifra optimiste, lidhur me situatën e koronavirusit në Shqipëri, në 24 orët e fundit.
Ai thotë se për herë të parë ka më shumë se dyfish të shëruarish në raport me të infektuarit.
“Sot për herë të parë është arritur të kemi 30% të infektuar aktivë dhe 66% të shëruar, duke ju referuar numrit total të infektimeve: 789, të shëruar 519 dhe të sëmurë aktivë 239. Shkurt sot kemi më shumë se dy herë të shëruar se të infektuar. Nëse do të vazhdohet kështu edhe në ditët në vijim situata do të vijë duke u përmirësuar”, shkruan Ruka.
Ai shton se kjo nuk do të thotë aspak se rreziku i pandemisë po zhduket, pasi ende ekzistojnë shumë vatra infeksioni që pa kujdes mund të shpërthejnë.
Në 24 orët e fundit në Shqipëri u raportuan 7 infektime të reja, ku përkatësisht në Tiranë janë 5 persona që kanë rezultuar pozitiv, një rast në Krujë dhe një rast i importuar në Kukës i evidentuar në qendrën karantinë të këtij rajoni.